Mayuh Nglestarikna Gropak

Banyumas, SBB.WP.com – Sugeng enjang kadang, sedulur, kanca, batir kabeh. Lagi pada ngapa yah dina minggu esuk kiye? Uwis pada tangi apa urung? Aja jere prei ngode, malah pada tangi awan. Emut sedulur, nek tangine kawanen mengko rejekine dijaluk pitik. Mengko dewek mangan apa jajal. Dadi gageha tangi, raup terus medang. Kayong nylekamin. Nyruput kopi pait karo maca-maca postingane inyong nang kene. Enak toh? Mantep toh? Wah koq inyong dadi kemutan Mbah Surip. Kae wong maring endi yah? Kangen lagune “Tak Gendong Kemana-mana”. Lha sih malah ngelantur kiye. Lhawong inyong arep kandah ‘gropak’. Ana sing kenal apa ora njajal? Anu apa kuwe? Gropak kuwe panganan sekang budin.

Kenangapa gropak inyong angkat nang blog kiye? Sebab, kuliner kuwe ya sebagian sekang budaya. Menurut Selo Soemardjan dan Soelaiman Soemardi, kebudayaan adalah sarana hasil karya, rasa, dan cipta masyarakat. Makane kuliner lokal sing klebu kebudayaan kuwe perlu diangkat, ben ora pada punah. Ben lestari, sukur pisan bisa nguripi maring masyarakat cilik Banyumas khususe. Mbok menawa sebare ditulis neng kene terus terkenal gutul luar negeri. Terus pada laris bakul gropake ngosi ekspor. Ya ora sedulur? Muga-muga bae ya. Amien.

Kanggo nulis artikel kiye, inyong dolan aring gone pak Dirtam, Desa Sokaraja Tengah, Kecamatan Sokaraja. Nang kana ana kelompok swadaya masyarakat (KSM) binaane Porgram Nasional Pemberdayaan Masyarakat Mandiri Perkotaan (PNPM MP) Kabupaten Banyumas. Aran KSMe “KSM SAMI RAOS”. Kelompok kuwe uwis ngadeg rong taun kepungkur. Tujuane ya kuwe mau mengembangkan home industri gropak. Inyong takon-takon masalah gropak maring pak Dirtam disambi dopokan karo guyon.

Gropak kuwe sejenis panganan sing asale sekang budin. Ana sing ngarani “opak budin”. Nek wong kana-kana mungkin ngaranine krupuk embok, sejane ya beda sih. Rasane gurih tur renyah, khas banget. Jeremonge pak Dirtam usaha industri gropak nang desa Sokaraja Tengah wis ana kawit taun 1960an. Tapi mulai terkenal tahun 1970an. Bu Mursinah sing ngawiti. Nek siki nang Sokaraja Tengah ana 30 omah sing usahane nggaweni gropak. Rata-rata ya keluarga miskin. Nggaweni gropak kanggo nopang ekonomi keluarga. Siki pemasaran gropak uwis gutul Ciamis, Tasik, Purwakarta, lan Jakarta.

Senejan mulai bisa nguripi, industri kiye tetep ana kendalane. Pertama kuwe keterbatasan alat. Alat-alat sing dienggo esih alat-alat tradisional terutama alat penggilingane. Makane KSM SAMI RAOS duwe niat arep ngajukna proposal bantuan hibah alat maring Dinas Perindustrian, Perdagangan dan Koperasi Kabupaten Banyumas. Sing keloro kuwe cuaca. Nek lagi mangsan udan produksi gropak angel, sebab ora bisa mepe gropake. Nek ora garing biasane dadi jamuran. Kendala kiye jane ya bisa diatasi karo alat, ya kuwe oven. Kiye mestine pemerintah turun tangan. Kanggo nguripna industri cilik, mestine pemerintah daerah aweh perhatian sing gedhe. Soale industri kiye uwis mulai bisa mbukak lapangan kerja anyar kanggo keluarga miskin. Mbantu banget maring program pemberdayaan masyarakat.

Nek kepengin ngerti carane nggawe gropak, inyong diwehi resepe kieh.

Bahane:

  • 1 kg budin, kupas terus digiling
  • 3-5 siung bawang putih
  • 3-5 siung brambang
  • 2-3 sdt ketumbar
  • 2-3 tangkai godong sledri, potong alus.
  • garam secukupe
  • 1/2 -1 sdt lada bubuk
  • 1/2- 1 sdt gula pasir

Carane:

  • Brambang, bawang putih, ketumbar lan garam giling gutul halus.
  • Campurna kabeh bumbu maring budin sing wis digiling.
  • Aja kelaken lada, godong sledri lan gula pasire. Aduk sampai rata.
  • Sebar adonan koleh wrata, jiot adonan sekepelan tangan, terus dicetak tipis-tipis digilis karo botol.
  • Siapna banyu nang panic terus digeneni nganti umeb. Genine cilik utawa sedeng baen.
  • Adonan sing uwis dicetak tipis-tipis dikukus.
  • Ngukuse ora suwe, mung 4-5 menit.
  • Bar kuwe mau, adonan dilepas seka nggon kukusane terus dipepe nang ngisor panase srengenge gutl garing kemlinthing.
  • Nek uwis garing, kari digoreng nganggo minyak panas.
  • Dadi, enak, kari disandingna.

Kuwe mau carane nggawe. Nek gropake dipangan disambi ngopi karo udud kayong nylekamin temen. Ora ngapusi lah. Lha nek rika arep praktek ya monggo. Nek esih bingung, ya ngaji bae karo pak Dirtam nang Sokaraja Tengah. Dolan nganah sekalian tuku kanggo oleh-oleh ya malah apik. Umume, gropak didol dikemas sebare dipepe garing. Urung digoreng ben awet. Oya kiye alamate pak Dirtam, RT 03/05 Desa Sokaraja Tengah, Kecamatan Sokaraja Kabupaten Banyumas, Jawa Tengah, Indonesia. Nomer telpone 087737561951 utawa 082138216101. Eh mbok menawa ana sing minat. Dijamin ora bakal kecewa. Nuwun.[]

 

Mas Nunu – Pimred www.ahmadtohari.com

2 thoughts on “Mayuh Nglestarikna Gropak

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s